A LOMCE segue adiante…

8 Novembro, 2013. Por: Carme Veiga

A polémica e as queixas do pobo non lle gañaron o pulso ao Parlamento. O 10 de outubro foi aprobada a LOMCE no Parlamento. Soamente o partido que goberna está de cordo coa nova Lei de Educación…

José Ignacio Wert, presentou en setembro de 2012 o seu anteproxecto de Lei Orgánica da Calidade da Educación. O ministro pretende con esta lei mellorar a calidade educativa española, que según el non está á altura da europea e adaptar a educación á situación de crise que estamos vivindo.

Despois de analizar os puntos desta lei, cheguei á conclusión de que é unha lei anti-constitucional, machista e elitista, polo que me manifesto totalmente en contra.

Estes son algúns puntos da lei que me gustaría destacar:

Aparecen avaliacións de diagnóstico e reválidas en varias etapas educativas: A primeira en 3º de primaria outra en 6º de primaria. A seguinte, en 3º da ESO. 4º da ESO será un curso orientativo, no que poderemos elixir entre ensinanzas aplicadas (FP) ou académicas (BACH), pero será necesario superar unha reválida para obter o título de ESO e acceder a Bacharelato. A última reválida terá lugar en 2º de BACH, se non se supera a reválida, non se consegue o título. O goberno argumenta a favor desta proposta que o alumnado terá unha maior motivación de estudo, pero os alumnos/as que non estean capacitados para seguir estudos académicos pasarán ao camiño da FP. Tamén asegura o ministro que, grazas ás reválidas, coñecerase o nivel académico do centro e os pais poderán elixir máis fácilmente o centro no que queren que estuden os seus fillos. Na miña opinión, non considero que unha reválida sexa unha motivación… E menos, cando te xogas o teu futuro nun único exame. Hai que destacar que se repites, automaticamente tes que ir polo camiño da formación profesional. A educación debe dar sempre segundas oportunidades, calquera persoa ten dereito a equivocarse. Por último, en teoría esta lei pretende aforrar cartos… As reválidas teñen un custo económico enorme.
Desaparece o dereito a voto do consello escolar, que pasa a ser un órgano consultivo. O director pasa a asumir as funcións do Consello Escolar. O Consello Escolar é un órgano moi importante nun centro, xa que lle permite a nais, pais e alumnos participar en decisións do centro e poder mostrar opinións e ideas. Poñer todo en mans do director paréceme unha eliminación da democracia interna dos centros públicos.
Promove soster con fondos públicos centros privados que segregan por razón de xénero. Este punto demostra claramente a actitude machista que ten esta lei, pois non respecta a igualdade entre homes e mulleres. Ademais, a Educación debe preparar aos alumnos/as para poder desempeñar un traballo no futuro, na vida laboral, homes e mulleres traballan xuntos.
Elimínanse todos os proxectos de atención á diversidade (PDC, PCPI, Agrupamentos…) Estes proxectos son os que definen a calidade da nosa educación, danlle ás persoas con dificultades a oportunidade de conseguir o título, fan máis xusta e igualitaria a nosa sociedade.
As linguas cooficias serán tratadas ao mesmo nivel que as linguas estranxeiras. Con esta medida, as linguas cooficias perden un papel moi importante na educación, o que vai provocar que desaparezan moitos falantes. No caso de Galiza, esta medida vai perxudicar moitísimo ao galego, xa que é unha lingua que non está normalizada.
As Administracións públicas poderán liberar solo para entregarllo ás empresas privadas coa fin de que constrúan colexios privados. Esta medida deixa totalmente en evidencia á lei… Manifestan que a LOE é unha lei insostible nestes momentos de crise e regálanlle solo aos colexios privados? Paréceme totalmente paradóxico.

É certo que a educación española precisa moitas melloras. Pero estas non son as solucións axeitadas. Esta lei o único que pretende é crear un sistema educativo clasificatorio, eliminando así a moitos estudantes que precisan unha axuda especial do sistema. A atención á diversidade é xustamente o que lle dá calidade á nosa educación.