realizado por: Aldara Muíños Rodríguez, Cinthia Carou González, María Domínguez Pérez

 

Dentro do proxecto Comenius no que estamos participando varios alumnos do IES Félix Muriel, organízanse visitas aos diferentes países.

Comezamos coa primeira  a Sesimbra, Portugal, neste Entroido. Alí,  tres alumnas reunímonos co alumnado turco, alemán e portugués.

Saímos de Rianxo o luns 3  para ir a Vigo  coller o tren, que nos levaría ata Porto e, despois dun trasbordo, ata Lisboa.  Logo dunha pequena  viaxe en coche, chegamos a Sesimbra, onde nos estaban agardando as alumnas portuguesas, que nos vestiron de pallasos para participar nun gran desfile de disfraces (cerca de 2000 persoas).

O segundo día visitamos a exposición que preparou o alumnado portugués sobre a vida na súa vila na década dos 60. Tiñan obxectos empregados na pesca e na agricultura, e tamén na escola e nas festas. Pola tarde asisitimos a un desfile de escolas de samba, que  cos seus traxes de plumas e cores bailaban polas rúas acompañados de tambores.

O terceiro día fomos á Serra da Arrábiga, máis concretamente ao Mosteiro, no que puidemos observar a precariedade na que vivían os monxes. Logo fomos ao Oceanário, onde nos contaron unha historia sobre unha esmeralda perdida no mar e sobre a que tivemos que escribir unha historia. Despois visitamos a Biblioteca Municipal de Sesimbra, onde asistimos a unha obra de teatro representada polo propio alumnado do Comenius.

O xoves fomos ao instituto cos nosos anfitrións, e asistimos a unha das súas clases.  Algúns fomos a Física e Química e outros a Inglés. O seu instituto é moi diferente do noso, como son moitos alumnos e non teñen clases para todos, teñen horas libres no medio do horario. Tamén teñen un sistema de tarxetas, coas que pagan na cafetería e sen a  cal non poden acceder ao centro.

 

Despois, pola tarde, collemos o autobús para ir a Lisboa, que percorremos nunha visita exprés. Vimos a Praza do Comercio, os famosos tranvías, o elevador de Santa Justa, a Baixa… Despois fomos a Belém, e alí vimos a Torre de Belém, o mosteiro dos Jerónimos e probamos os pasteis de Belém, que estaban moi bos.

Logo, voltamos ao colexio e tivemos unha cea con todos os estudiantes e as familias, con moita comida. Dende o típico bacalao ata unha tarta co logo do Comenius dibuxado.

A nosa última mañá en Portugal pasámola en Lisboa cos  nosos profesores, visitamos a Alfama e paseamos contemplando a cidade.  Finalmente collemos o tren e despedímonos de Portugal e dos novos amigos.

Pasámolo moi ben, coñecemos rapaces doutros países e aprendemos moito. Recomendámosvos que viaxedes porque é unha experiencia única.