O sábado 28 de marzo, tal e como xa anunciamos hai un par de semanas, tivo lugar no Instituto Galego de Información (Santiago de Compostela) unha xuntanza de Equipos de Normalización e Dinamización Lingüística á que se adheriron uns 120 equipos. Nesa convocatoria, acordouse o seguinte:

1.       Convídase a todos os Equipos de Normalización a apoiar o texto, que se atopa no documento anexo, e que foi resultado do debate e as modificacións que se fixeron ao borrador inicial que levaron á xuntanza o grupo de docentes que fixo a convocatoria. Hai dúas maneiras de achegar o apoio dos equipos:

a. Enviando un fax ao número 981800064, no que se identifique o centro educativo e o concello no que está situado, así como o nome e apelidos do coordinador ou coordinadora xunto co seu número de DNI e o seu correo de contacto para facilitar a comunicación directa cos equipos no futuro.

b. A través da páxina web http://www.coordinadoraendl.org/, habilitada expresamente para este fin, que reproduce o texto e solicita os datos identificativos do ENDL e o/a coordinador/a.

 
2. Así mesmo, o sábado 18 de abril ás 10:45 quedamos convocados á entrada da Estación de Autobuses de Santiago de Compostela para ás 11:00 darlle entrada no Rexistro da Xunta a este documento avalado polos ENDL. Esta é unha primeira entrega de sinaturas. Posteriormente, faranse novas entregas de sinaturas a medida que se vaia desenvolvendo a campaña de recollida de adhesións dos equipos. É importante que se achegue o maior número de persoas a este primeiro acto público.

3. Posteriormente, ás 11:30 dará comezo a asemblea constitutiva da Coordinadora Galega de ENDL no MUPEGA, Museo Pedagóxico de Galicia (San Lázaro, Santiago de Compostela). Se hai algún cambio de localización do encontro, será comunicado.

Desde www.consellodacultura.org poderase reproducir ou descargar dez documentos sonoros con fragmentos de entrevistas, reflexións, programas radiofónicos e intervencións parlamentarias protagonizadas por Ramón Piñeiro (Láncara-Lugo, 1915-Santiago de Compostela, 1990) , a quen este ano se dedica o " Día das Letras Galegas " e que foi unha figura relevante do galeguismo tanto no ámbito político (membro do Partido Galeguista ) e cultural (fundador e primeiro director da Editorial Galaxia e da revista Grial ) ademais de ser deputado do Parlamento de Galicia e  Presidente do Consello da Cultura Galega (1983-1990).

Estes documentos están a disposición do público sempre que non se lle dean un uso comercial . Os documentos son os seguintes:

Tertulia sobre as Fundacións (Radio Nacional de España), doado por Avelino Pusa Antelo.
Da terra e dos tempos. Emisión cultural en galego (Radio Nacional de España), doado pola Asociación Cultural “O Facho”.
Reflexións sobre o galeguismo. Tres conferencias. Doadas polo Liceo Recreo Ourensán e dúas polo semanario “A Nosa Terra”.
O Espello: Trinta anos de Galaxia. (Radio Popular de Ferrol). Doado polo Patronato de Cultura Galega de Montevideo.
Debate da Lei de Normalización Lingüística. Doazón do Parlamento de Galicia.
A intervención de Ramón Piñeiro na clausura do Encontro sobre culturas minoritarias europeas, celebrado en Compostela en 1987. E dúas entrevistas doadas por Antón Mascato.

Pódese escoitar musicado por Roi Casal en YouTube.

…..Por amainala conciencia guindei co meu título de médico no fondo dunha gabeta, e busquei outra maneira de me valer. As xentes xa non sabían que eu era dono de tan tremenda licencia oficial; mais unha noite foron requiridos os meus servicios.
…..Era domingo. Melchor, o taberneiro, agardaba por min ó pé da porta. Deume as boas noites e rompeu a chorar, e por entre os saloucos saíanlle as verbas tan estruchadas que soamente logrou dicirme que tiña un fillo a morrer.
…..O pobre pai turraba por min, e eu deixábame levar, enfeitizado pola súa dor. ¡Despois de todo eu era médico titulado e non podía negarme! E tiven tan fortes anceios de compracelo que sentín xurdir nos meus adentros unha grande ciencia…
…..Cando chegamos á casa de Melchor logrei arriarme das súas mans, e con finxido acoitamento confeseille que sabía pouco da carreira…
…..-Repara que hai moitos anos que non visito enfermos.
E entón Melchor, facendo un esforzo, díxome quedamente:
…..-O meu fillo xa non precisa de médicos. Eu xa sei que o coitado non pasa da noite. E váiseme, señor; ¡váiseme e non teño ningún retrato seu!
…..Ai, eu non fora chamado como médico; eu fora chamado como retratista, e no intre sentín ganas acedas de botarme a rir.
…..E por verme ceibe de xeira tan macabra díxenlle que unha fotografía era mellor ca un deseño, asegureille que de noite poden facerse fotografías, e botando man de moitos razonamentos logrei que Melchor largase de min á cata dun fotógrafo. A cousa quedaba arrombada, e funme durmir, con mil ideas ensarilladas na chola.
…..Cando estaba prendendo no sono petaron na miña porta. Era Melchor.
…..-¡Os fotógrafos din que non teñen magnesio!
…..E díxomo tremendo de anguria. A face albeira, e os ollos coma dous tetos de carne vermella de tanto chorar.
…..Endexamais fitei a un home tan desfeito pola dor.
…..Pregaba, pregaba, e collíame as mans, e turraba por min, e o malpocado dicía cousas que me rachaban as entrañas:
…..-Considérese, señor. Dous riscos de vostede nun papel e xa poderei ollar sempre a cariña do meu neno. ¡Non me deixe na escuridade, señor!
…..¡Quen teria corazón para negarse! Collín papel e lápiz, e alá me fun con Melchor, disposto a facer un retrato do rapaz moribundo.
…..Todo estaba quedo e todo estaba calado. Unha luz cansa alumeaba, en amarelo, dúas facianas arrepiantes que ventaban a morte. O neno era o centro daquela pobreza da materia.
…..Sen dicir nada senteime a debuxa¬lo que ollaban os meus ollos de terra, e soamente ó cabo dalgún tempo conseguín afacerme ó drama que fitaba e aínda esquecelo un pouco, para poder traballar afervoado, coma un artista. E cando o deseño estaba xa no seu punto a voz de Melchor, agrandada por tanto silencio, feriume con estas verbas:
…..-Pola alma dos seus defuntos, non mo retrate así. ¡Non lle poña esa cara tan encoveirada e tan triste!
…..Confeso que ó volver á realidade non souben que facer, e púxenme a repasa¬las liñas xa feitas do retrato. O silencio foi esgazado novamente por Melchor:
…..-Vostede ben sabe como era o meu rapaciño. Faga memoria, señor, e debúxemo rindo.
…..De súpeto naceume unha grande idea. Rachei o traballo, ensumín o meu ollar nun novo papel branco e debuxei un neno imaxinario. Inventei un neno moi bonito, moi bonito: un anxo de retábulo barroco, a sorrir.
…..Entreguei o debuxo e saín fuxindo, e no intre de poñe-lo pé na rúa sentin que choraban dentro da casa. A morte viñera.
…..Agora Melchor consólase ollando a miña obra, que está pendurada enriba da cómoda, e sempre di coa mellor fe do mundo:
…..-Tiven moitos fillos, pero o máis bonito de todos foi o que me morreu. Velaí está o retrato que non mente.

Despois das presentacións que nos fomos facendo a través das cartas que se poden ler nesta revista, chegou por fin o día en que nos coñecemos en persoa. A experiencia foi xenial.

Vota á Terra simplemente apagando as túas luces durante unha hora e únete ao mundo pola “Hora da Terra”.

Sábado 28 de marzo de 8:30 a 9:30 da tarde.

     Traducido da páxina www.earthhour.org

A Real Academia Galega (RAG) acaba de distribuír o segundo volume do Mapa Sociolingüístico de Galicia 2004 (MSG-04), correspondente aos usos lingüísticos, e no que se constata un forte descenso do uso do galego nos últimos anos.

LINGUA DE AMOR 2009
 
Xa está en marcha a 3ª edición de Lingua de Amor, o concurso de cancións e declaracións de amor en galego
 
O Consello da Xuventude de Galicia, a través do seu Servizo de Normalización Lingüística e en colaboración co Servizo de Normalización Lingüística do Concello de Vigo, presenta a terceira edición de Lingua de Amor, o concurso de cancións e declaracións de amor a través do correo electrónico.

Un dos principais obxectivos de Lingua de Amor é dinamizar o uso da lingua galega por parte dos mozos e mozas nos novos espazos de comunicación: correos electrónicos, chats, foros… O galego é unha lingua útil para os momentos de lecer e diversión, perfectamente válida para a música. O galego ábreche as portas á hora de coñecer xente, de facer amigos e… por que non? Tamén para formar parellas!

NOTA: debido ao cambio de deseño e adaptación da web ás novas necesidades técnicas, o rexistro estará operativo a partir do vindeiro venres 20 de marzo.

BASES DO CONCURSO:
Con motivo da celebración do Día das Letras Galegas e do Día Internacional da Internet presentámosvos a terceira edición de Lingua de amor, o concurso de declaracións de amor a través do correo electrónico, e que este ano, como novidade, inclúe unha nova categoría: a musical.
1 Obxectivos do concurso
- Un dos obxectivos principais deste concurso é conquistar novos espazos de uso para o galego: internet, o correo electrónico ou os chats son espazos de comunicación nos que os mozos e mozas empregan o castelán como lingua habitual. Pretendemos con este concurso dinamizar o uso da lingua galega entre os máis novos nestes espazos de comunicación habitual.
- Pretendemos vincular as rapazas e rapaces de Galicia coa súa lingua e incrementar a percepción do galego como unha lingua que é útil para as actividades de lecer e momentos de diversión: o galego ábreche ás portas á hora de coñecer xente, facer amigos e… por que non? Tamén para formar parellas!
- Así mesmo, outro obxecto é relacionar o galego coas formas de diversión xuvenil e potenciar os seus valores como unha lingua próxima, útil e moderna, perfectamente válida para a música. A normalización da lingua galega en moitas ocasións céntrase en contextos institucionais marcadamente formais que non chegan á mocidade dun xeito atractivo. Con este concurso o que pretendemos é normalizar o uso da nosa lingua dende unha perspectiva lúdica, actual e atractiva para a xente nova.

2 Este concurso organízao o Consello da Xuventude de Galicia, a través do seu Servizo de Normalización Lingüística, en colaboración co Servizo de Normalización Lingüística do Concello de Vigo, a Secretaría Xeral de Política Lingüística e a Libraría Couceiro.

3 O concurso Lingua de amor consta de dúas modalidades:
- MODALIDADE 1: declaracións de amor en galego a través da rede
- MODALIDADE 2: cancións de amor en lingua galega
 
4 MODALIDADE 1: declaracións de amor en galego a través da rede

- Consiste na elaboración dunha mensaxe que conteña unha declaración de amor. Todas as declaración que se envíen deberán estar escritas en lingua galega.
- A temática das mensaxes será amorosa e poderán estar escritas en prosa ou en verso.
- A extensión máxima da mensaxe é de 350 caracteres, incluídos os espazos en branco. As mensaxes que excedan esta extensión quedarán fóra do concurso.
- Terase en conta o grao de elaboración e a orixinalidade. Ademais todas as declaracións deberán ser inéditas.
- Establecerase un máximo de dúas mensaxes por participante.
- Establécense dúas categorías de idade dentro da modalidade 1:

Categoría A: de 14 a 19 anos
Categoría B: de 20 a 35 anos
- Para poder enviar as mensaxes é necesario rexistrarse na páxina do concurso: www.linguadeamor.eu, para o que se deberá cubrir un formulario de inscrición.
- Todas as mensaxes serán publicadas na páxina www.linguadeamor.eu. Só aparecerán con nome as mensaxes gañadoras.
- A data límite para o envío das declaracións é o 10 de maio de 2009.
- As persoas que queiran participar só como votantes tamén se deberán rexistrar na páxina do concurso. Para esta modalidade o proceso de votacións será o seguinte: os usuarios contarán cun máximo de dez votos por cada unha das categorías de idade. Os usuarios poderán modificar as súas votacións mentres dure o período establecido para isto.
- O período de votacións permanecerá aberto dende o 11 ata o 17 de maio.
- O xurado estará composto pola presidenta do Consello da Xuventude de Galicia, a concelleira de Igualdade, Xuventude e Normalización Lingüística do Concello de Vigo, dous representantes de recoñecido prestixio do mundo da cultura e as técnicas de normalización lingüística do CXG e do Concello de Vigo.
- O xurado do concurso reunirase unha vez rematado o prazo de votación, e elixirá as declaracións gañadoras de entre as 100 declaracións máis votadas polos usuarios en cada unha das categorías de idade.
- Os nomes das persoas gañadoras faranse públicos o 21 de maio na páxina web do concurso (www.linguadeamor.eu). Contactarase coas persoas gañadoras a través do número de teléfono que se facilitara no formulario de inscrición.
- O 30 de maio haberá unha entrega de premios que terá lugar na cidade de Vigo
- Establécense tres premios por cada unha das categorías de idade:
Categoría A:
1.º Un ordenador portátil
2.º Unha videoconsola PlayStation3
3.º Un Ipod

Categoría B:
1.º Un ordenador portátil + unha cea para dúas persoas
2.º Unha videoconsola PlayStation3 + unha cea para dúas persoas
3.º Un Ipod + unha cea para dúas persoas
Ademais destes premios, todas as persoas gañadoras recibirán un lote de libros en galego.
- A organización do concurso poderá desbotar aquelas mensaxes de carácter discriminatorio ou ofensivo.
 

5 MODALIDADE 2: cancións en galego
- Consiste na elaboración dunha canción cuxo contido estea relacionado coa temática deste concurso: o amor (á parella, á familia, á terra, aos animais, á lingua…), o desamor, a amizade, as relacións persoais… Así mesmo, tamén se poderán musicar poemas de amor da literatura galega.
- Todas as cancións que participen deberán empregar o idioma galego.
- Nesta modalidade, poderán participar todas as persoas ou grupos que o desexen, sen límite de idade. O/A concursante deberá ser obrigatoriamente o artista/intérprete e o autor da maqueta presentada a concurso, aínda que poderá estar acompañado na interpretación por outros músicos (estes non serán considerados como concursantes).
- O estilo das cancións é libre.
- Non se admiten cancións que inciten ao racismo, á xenofobia, á homofobia, a calquera tipo de violencia, fagan apoloxía do terrorismo ou que atenten conta a dignidade da persoa.
- As cancións deberán ser orixinais e non poderán estar suxeitas a ningunha obriga contractual previa. A organización do concurso non se responsabiliza da autoría das composicións. Calquera apropiación indebida de dereitos de autor na canción é responsabilidade da persoa que a inscribiu.
- Cada autor/a ou grupo poderá participar co número de obras que considere oportuno.
- As maquetas das cancións deberán enviarse a través da páxina web do concurso en formato audio (.mp3) ou vídeo en quicktime (.mov)
- Para poder enviar as maquetas é necesario rexistrarse na páxina do concurso: www.linguadeamor.eu, para o que se deberá cubrir o formulario de inscrición.
- Os autores e autoras ceden gratuitamente os dereitos das súas cancións para facer uso delas sen fins comerciais co fin da promoción do concurso durante este ano ou en convocatorias posteriores.
- Todas as cancións serán publicadas na páxina www.linguadeamor.eu. Publicarase o título da obra, o estilo e o nome do autor/a ou grupo.
- A data límite para o envío das cancións é o 10 de maio de 2009.
- O período de votacións permanecerá aberto dende o 11 ata o 17 de maio.
- As persoas que queiran participar só como votantes tamén se deberán rexistrar na páxina do concurso. Para esta modalidade o proceso de votacións será o seguinte: os usuarios poderán asignarlle a cada unha das cancións unha puntuación, que irá do 1 ao 5. Os usuarios poderán modificar as súas votacións mentres permaneza aberto o prazo para votar.
- O xurado estará composto pola presidenta do Consello da Xuventude de Galicia, a concelleira de Igualdade, Xuventude e Normalización Lingüística do Concello de Vigo, dous representantes de recoñecido prestixio do mundo da industria musical e as técnicas de normalización lingüística do CXG e do Concello de Vigo.
- O xurado do concurso reunirase unha vez rematado o prazo de votación, e elixirá as cancións gañadoras de entre as 20 máis votadas polos usuarios.
- Os nomes das persoas/grupos gañadores faranse públicos o 21 de maio na páxina web do concurso (www.linguadeamor.eu). Contactarase coas persoas gañadoras a través do número de teléfono que se facilitara no formulario de inscrición.
- O 30 de maio haberá unha entrega de premios que terá lugar na cidade de Vigo
- Establécense tres premios ás tres mellores cancións:

1º Un ordenador portátil + unha fin de semana nunha casa de turismo rural
2º Unha videoconsola PlayStation3 + unha fin de semana nunha casa de turismo rural
3º Un Ipod + unha fin de semana nunha casa de turismo rural

6 A participación neste concurso implica a plena aceptación destas bases
7 A organización resérvase o dereito de modificar e interpretar as bases deste concurso sempre e cando fose necesario para o seu bo desenvolvemento.
 
Achegámosvos xunto con este correo o cartel e as bases do concurso en formato .pdf.
Agradeceriámosvos que lle désedes a maior difusión posible a esta actividade.
 
Consello da Xuventude de Galicia
Servizo de Normalización Lingüística
www.linguadeamor.eu
linguadeamor@cxg.org